Materialien 1995

Kreuzzug

In Bayern is da Teifi los, as Urteil, des is gsprocha,
der Antichrist in Karlsruhe, der hat de Sünd’ vabrocha!
Unser boarisch’s Abendland zerstört mit satanische Tricks,
aus allen bayrischen Schulen – verbannt das Kruzifix!

De gottverlassnen Richter, de san vom Teifi b’sessn,
Patrona Bavariae steh uns bei, an Herrgott hams vergessn!
Alle Kreuzungen wern abgschafft, as Rote Kreuz verboten,
de Gipfelkreuz’ san umgsägt, von Ketzern und Chaoten!

De Wieskirch is am Erdbodn gleich, in Oberammergau is’ gfeit,
bei de frommen Herrgottschnitzer: Massenarbeitslosigkeit!
Und weils d’Verfassung boykottiern, da hört si auf da Gspaß,
steht de bayrische Regierung unterm Radikalnerlaß!

Nach Kastelruth in Südtirol flücht’ jetz d’Regierung ins Exil,
die Stille Hilfe Südtirol finanziert das Domizil!
Solidaritätsbekundungen kemman aus St. Pölten und Teheran,
da Beckstein bittet um Asyl, drunt in Kurdistan!

Die GSG-9 hat Wildbad Kreuth ganz fest in ihrer Hand,
doch in den bayrischen Biergärten, da wächst der Widerstand!
Und siehe da! Am Brunnthal-Kreuz versammelt sich ein Heer!
Da Stoiber ziahgt mitm Kreuz voran, und stündlich werden’s mehr!

Opus Dei, gführt vom Ratzinger, dem Alpen-Ayatollah,
mit schweren Schneekanonen die Gebirgsschützen-Hisbollah,
da Gauweiler, da Haider, ois’ marschiert in Trachtenjackn,
gar manches Kreuz, des mittragn werd, des hat an kloana Hakn!

Da Stoiber führt den Kreuzzug in den heiligen Krieg,
in München beim Oktoberfest erkämpfen sie den Sieg!
Bayern is jetz wieder Gottesstaat, es herrscht der wahre Glaubn,
ein jeder BMW kriagt vorn a Kreuz auf d’ Kühlerhaubn!

In da Schui gibts wieder Prügelstraf’, wer an Rosenkranz net kennt,
und in Schongau, da hams letzte Woch a Waldorfhex verbrennt!
Die Kirchen im ganzen Bayernland san endlich wieder voi
und alle machan bei da Wahl ’s Kreuz an da rechtn Stoi!

Wia s’ an Herrgott im Himmi gfragt ham
wo er denn hänga wui,
sagt er: Um Gottes Willen,
in koana boarischn Schui!!!

Biermösl-Blosn

Süddeutsche Zeitung vom 23./24. September 1995.